O renovado IES Aquis Celenis abre unha nova etapa tras a súa ambiciosa ampliación

O IES Plurilingüe Aquis Celenis de Caldas de Reis estreou este xoves a súa nova imaxe tras culminar un ambicioso proxecto de ampliación e rehabilitación integral.

A inauguración contou coa presenza do presidente da Xunta, Alfonso Rueda, e do conselleiro de Educación, Ciencia, Universidades e Formación Profesional, Román Rodríguez.

Como nota curiosa da xornada, Rueda non realizou intervención pública nin declaracións aos medios debido aos efectos dunha anestesia administrada durante unha cita co dentista á que acudira a primeira hora da mañá.

Durante o acto, Román Rodríguez destacou que a actuación supuxo un investimento próximo aos seis millóns de euros, o que a sitúa como a ampliación máis importante que se executou actualmente nun centro educativo de Galicia.

Román Rodríguez afirmou que esta reforma converte ao instituto caldense nun dos exemplos máis destacados da aposta da Xunta por modernizar as infraestruturas educativas galegas.

As obras permitiron transformar por completo un edificio con case catro décadas de antigüidade.

Unha intervención que a Administración autonómica consideraba prioritaria tanto para incrementar a capacidade do instituto como para mellorar as condicións de estudo e traballo da súa comunidade educativa.

O proxecto beneficiará directamente aos 39 docentes, nove profesionais non docentes e aos preto de 350 estudantes de ESO e Bacharelato que desenvolven a súa actividade diaria no centro.

Entre as actuacións máis destacadas figura a ampliación da superficie construída en máis de 2.000 metros cadrados, a creación de 34 novas aulas e a adaptación dos espazos ás actuais recomendacións pedagóxicas, que apostan por contornas máis versátiles e funcionais.

Ademais, construíronse un novo ximnasio e vestiarios, renovouse a cuberta do edificio, substituíronse centos de carpinterías e máis dun milleiro de luminarias por sistemas LED de baixo consumo, e instaláronse falsos teitos acústicos para mellorar o confort e a eficiencia enerxética das instalacións.

Porén, a inauguración tamén estivo marcada polas críticas do BNG de Caldas de Reis, que valorou positivamente a reforma pero considerou que a actuación "queda curta" para resolver todas as necesidades do instituto.

O voceiro nacionalista, Manuel Fariña, sostén que persisten carencias importantes, especialmente no ámbito deportivo.

Ademais, o BNG reclama que a Xunta complemente a mellora das infraestruturas coa implantación de novos ciclos formativos vinculados ás necesidades económicas e laborais da comarca.