O Centro de Acollida e Protección de Animais (CAAN) da Deputación de Pontevedra recolleu nos últimos días unha camada de catro cachorros que apareceron abandonados nunha caixa xunto a un colector de lixo en Vilaboa.
Segundo a información facilitada pola Deputación, son dúas femias, Rosalía e Flabia; e dous machos, Aldán e Anxo.
Estímase que teñen preto de vinte días de vida e atópanse en boas condicións.
A Deputación deu a coñecer este rescate este luns ao mesmo tempo que informa de que a Xunta de Galicia concedeu ao CAAN unha achega por preto de 37.000 euros para financiar os gastos derivados de esterilizacións de cans, identificacións con microchip, compra de alimentos e vacinacións realizados nas instalacións da Armenteira.
Todos os cans que saen do centro en adopción fano vacinados, identificados con chip, desparasitados e esterilizados.
Entre o 1 de setembro do 2022 e o 31 de agosto deste 2023, realizáronse un total de 808 identificacións e 394 esterilizacións.
En total, recolléronse 1.511 animais nos 52 concellos adheridos a este servizo na provincia.