A situación asistencial da área sanitaria de Pontevedra e O Salnés está lonxe de normalizarse, pero o certo é que as últimas 24 horas deron certo respiro aos hospitais. Segundo o Servizo Galego de Saúde, hai 146 pacientes ingresados por covid-19, catorce menos que onte.
A maior parte dos hospitalizados (117) están nas unidades de hospitalización para enfermos de covid-19. Hai 94 infectados atendidos en Montecelo. Outros doce están no Hospital do Salnés e hai once no QuirónSalud Miguel Domínguez de Pontevedra.
Os pacientes máis graves, que están ingresados na unidade de coidados críticos (UCI) de Montecelo, son 29 nestes momentos, segundo os datos achegados polo Sergas. É un menos dos que estaban a ser atendidos o día anterior.
O resto dos que contraeron o virus, outras 2.432 persoas, atópanse illadas nos seus domicilios e recuperándose baixo supervisión médica.
Pero o que non se reduce é a presión que exercen os novos contaxios. O ritmo de infectados non decae na área sanitaria de Pontevedra e O Salnés, que sumou 179 contaxiados nas últimas 24 horas.
Os casos activos por covid-19, tras esta alarmante cifra, sitúanse en 2.578. Nunca antes houbo tantos. Son 75 máis que onte, tal e como recollen as estatísticas sanitarias.
Desde o inicio da pandemia 8.053 pacientes da área sanitaria superaron a covid-19, 102 nas últimas 24 horas, e rexistráronse 117 falecementos asociados ao virus. Os últimos, dous homes de 74 e 86 anos que morreron en Montecelo e o Hospital do Salnés.
En canto á realización de probas PCR, fixéronse na área sanitaria de Pontevedra e O Salnés un total de 144.328, 1.121 nas últimas horas. Delas, 125 deron positivo (11,15%). A estas probas súmanse as 55.479 seroloxías realizadas ata a data.
INCIDENCIA EN GALICIA
A nivel autonómico a Dirección Xeral de Saúde Pública informa que o número de casos activos de coronavirus en Galicia é de 22.440, 82 menos que o día anterior. Deles 5.889 son da área da Coruña, 2.093 da de Lugo, 2.815 da de Ourense, 2.578 da de Pontevedra, 3.867 da área de Vigo, 3.366 da de Santiago e 1.832 da de Ferrol.
Do total de pacientes positivos, 247 están en UCI, 1.125 en unidades de hospitalización e 21.068 no domicilio. Por agora, en Galicia hai un total de 75.947 persoas curadas, rexistrándose 1.843 falecementos.
Desde o inicio da pandemia realizáronse en Galicia 1.447.952 probas PCR, 13.465 nas últimas 24 horas, que permitiron detectar a 935 novos infectados.