A avenida do Doutor Tourón e o tramo inicial da avenida de Cambados terán tráfico restrinxido entre o luns e o mércores desta semana entrante.
Os días 20, 21 e 22 vam fresar e asfaltar esta zona. Segundo informa o goberno local, para evitar o peche de todo o trazado, actuarase primeiro nun sentido e despois, no outro.
Estableceranse semáforos temporais e os operarios regularán o tráfico atendendo ao avance da obra.
Ante esta situación, o Concello recomenda vías alternativas. Para saír da cidade cara ao sur piden que se utilice a avenida de Agustín Romero, partindo da glorieta da Mariña Española. Quen queira entrar procedente da circunvalación ou desde Sobradelo, a estrada vella de Cambados, debería realizalo por Pablo Picasso, partindo da rotonda do porto, xunto ao supermercado Eroski. Está prevista a instalación de carteis indicativos.
O goberno local lembra que a empresa que executa os traballos concluíu a reparación e ampliación das beirarrúas, onde haberá bancos e árbores; e as zonas de aparcamento. Unha vez asfaltados os dous tramos das avenidas afectas pintarase e sinalizarase verticalmente a zona. Tamén se restituirá o tramo de ciclovía.
Os cálculos sitúan na primeira semana de abril a finalización da obra realizada nas rúas adxacentes á rotonda. O investimento realizado ascende a case 180.000 euros, aos que se suma o custo do estudo técnico dunha enxeñería especializada en mobilidade.