Un operativo de limpeza ambiental logrou retirar este sábado un total de 1.812 quilos de lixo mariño na contorna dos illotes de Guidoiros Areoso e Pedregoso.
A iniciativa, integrada no proxecto PLANCTON da Obra Social de ABANCA, contou coa participación de 80 voluntarios, entre os que se atopaban 41 mergulladores especializados, e o apoio de 18 embarcacións.
A xornada comezou ás 9:30 horas coa saída da frota desde o porto do Xufre, na Illa de Arousa. Durante catro horas e media, os equipos traballaron de xeito coordinado tanto nas profundidades mariñas como na superficie dos areais para extraer diversos materiais contaminantes.
Os traballos de inmersión, coordinados polo Club Subacuático Pérez-Sub, centráronse na recuperación de aparellos de pesca extraviados. Os mergulladores extraeron dos fondos grandes acumulacións de redes, pneumáticos, nasas e cabos.
Pola súa banda, o persoal voluntario que operou en terra localizou en Pedregoso e Areoso restos de poliespán e cordas.
O dato máis destacado nesta zona de superficie foi a acumulación de botellas de plástico, que representaron o 95 % dos residuos recollidos nos illotes. O Concello da Illa de Arousa será o encargado de realizar a xestión final de todos estes materiais.
Esta intervención supón a novena acción realizada nesta zona específica desde o inicio do plan en 2021. Nestes catro anos, o volume de lixo retirado só neste enclave da ría de Arousa ascende a case 12 toneladas.
A nivel autonómico, o programa PLANCTON alcanza xa a súa sexta edición con máis de 150 toneladas de residuos recollidos en diferentes puntos da costa galega.
Nesta xornada colaboraron diversas entidades, entre elas a Confraría de Pescadores de San Xulián, o Servizo Marítimo da Garda Civil, o Servizo de Patrimonio Natural de Pontevedra e varios clubs de mergullo da comarca.