A Policía Nacional está a realizar desde primeira hora deste mércores diferentes rexistros en varios municipios da zona de Arousa nun novo operativo contra o tráfico de drogas en Galicia.
Fontes da investigación confirmaron a PontevedraViva que estes rexistros, por agora, producíronse en tres propiedades de Vilanova de Arousa e Ribadumia.
Habería, segundo estas mesmas fontes, varios detidos.
Esta operación está dirixida por un xulgado de Santiago de Compostela.
O subdelegado do Goberno en Pontevedra, Abel Losada, subliñou que este operativo está baixo segredo de sumario e só confirmou que estes rexistros "están en marcha".
Este operativo, segundo Losada, dá continuidade a outro que se rexistrou "en semanas anteriores" noutra comarca galega.
Axentes das comisarias de Santiago, Vilagarcía e Pontevedra, xunto con efectivos do grupo de resposta especial para o crime organizado (Greco) da Policía Nacional están a participar neste dispositivo.
"A sociedade pode estar segura de que, nesta loita difícil e continua contra o narcotráfico, contamos ao noso favor cos mellores profesionais", subliñou o subdelegado, que considera que esta é unha "realidade incontestable".
Por iso é polo que Abel Losada quixera felicitar á Policía Nacional pola súa "profesionalidade, exhaustividade e compromiso" na loita contra o narcotráfico "a todos os niveis", desde o menudeo até as organizacións que importan grandes cantidades de droga.