A provincia de Pontevedra desembarca esta semana en Madrid co obxectivo de manter o seu liderado como destino de calidade na Feira Internacional de Turismo (Fitur).
A Deputación provincial, encabezada polo seu presidente Luis López, xunto cos vicepresidentes Rafa Domínguez e Luisa Sánchez e o deputado de Turismo, Jesús Vázquez Almuíña, protagonizará unha intensa axenda que abrangue preto de trinta eventos estratéxicos para divulgar a riqueza turística dos 61 concellos pontevedreses.
A actividade institucional vai comezar este mesmo mércores 21 cunha ducia de citas que poñen o foco na diversificación da oferta.
A delegación pontevedresa participará en encontros clave que van desde a excelencia do astroturismo e a proxección da provincia como un plató de rodaxes audiovisuais, ata a posta en valor de fitos patrimoniais e territoriais como a Catedral de Tui, o conxunto histórico de Combarro ou o potencial da Mancomunidade do Salnés.
Toda esta oferta será baixo o paraugas dun modelo de turismo responsable e vencellado ás distintas rutas do Camiño de Santiago.
O momento máis agardado desta edición terá lugar o xoves ás 11:30 horas no stand de Turismo de Galicia. Baixo o título “A túa meta, o teu destino”, a Deputación presentará a súa ambiciosa campaña promocional para o 2026.
O acto, que contará coa condución da actriz Marta Larralde, servirá para presentar un vídeo que redefine a provincia como un gran "polideportivo" natural ao aire libre.
Esta estratexia non busca só o impacto visual, senón que persegue obxectivos estruturais como a desestacionalización e a descentralización das visitas, apostando por un viaxeiro que procure conectar coa natureza a través do deporte e a sostibilidade en calquera época do ano.
DEPORTE, GASTRONOMÍA E CALIDADE
O Goberno provincial participará noutras quince iniciativas que reflicten a polifonía do destino Pontevedra: desde o turismo deportivo e os sendeiros azuis ata propostas gastronómicas de referencia como a Ruta da Sidra da Estrada ou a centola do Grove.
Tamén haberá espazo para o turismo slow no Salnés, o xeodestino Condado-Paradanta e proxectos transfronteirizos como a rede de cruceiros ibéricos fluviais.
A relevancia de Pontevedra no mapa turístico nacional quedará referendada coa súa participación no Encontro das Rexións Españolas de NECStouR e na prestixiosa gala de entrega dos premios Q de Calidade e S de Sostibilidade Turística.
A intención é potenciar nesta cita o compromiso do territorio cun modelo de crecemento equilibrado e de excelencia, segundo indican desde a Deputación de Pontevedra.