O presidente do Partido Popular de Pontevedra, Alfonso Rueda, e o secretario xeral do partido, Luis López, mantiveron este mércores pola noite unha reunión de traballo con concelleiros e afiliados do Partido Popular de Poio, coa vista posta nas eleccións municipais que se celebran o ano próximo.
Rueda puxo en valor o traballo de toda a xunta local, "un equipo organizado, que ten resultados, e que está moi pegado ás necesidades da cidadanía", así como do presidente local, Ángel Moldes, ao que agradeceu "o traballo serio e incansable" durante estes anos.
Un traballo "recoñecido" tamén polos veciños de Poio, e recordou que o PP gañou as eleccións municipais en 2019 e as autonómicas en 2020, e que aspira a volver a ser a forza maioritaria en dous anos.
"Somos o partido que goberna a Xunta de Galicia, e seremos tamén o partido que goberne en Poio a partir de 2023", afirmou Rueda.
Con todo, sinalou que queda moito traballo por diante. "Temos que seguir na rúa, escoitando ás persoas. Cando se está próximo á cidadanía, escoitando o que necesitan e atendendo as súas inquedanzas e preocupacións, é máis fácil acertar".