A provincia de Pontevedra podería converterse pronto nun dos platós máis desexados para as grandes producións audiovisuais.
A Deputación organiza ata o luns unha viaxe de familiarización na que participan representantes de produtoras tan potentes como Netflix, Sony Pictures, Marvel Studios, Warner Bros ou Atresmedia.
Os responsables dalgúns dos títulos máis famosos do cinema e da televisión mundial veñen coñecer de preto o noso territorio.
Nesta viaxe, que arrinca este xoves, participan localizadores profesionais, esas persoas encargadas de atopar os lugares perfectos para rodar escenas que quedan gravadas na retina do público.
Traballan con producións como The Walking Dead, Batman Begins, Fast & Furious, El renacido, Midsommar ou La sociedad de la nieve, e agora terán a oportunidade de descubrir todo o potencial da provincia para acoller proxectos dese nivel.
O programa comeza forte o venres, cunha visita á zona industrial de Vigo, un percorrido por Baiona, un paseo en barco polo río Miño e unha parada en Tui, unha xoia patrimonial.
Nesa mesma xornada haberá unha sesión formativa na que profesionais galegos do audiovisual compartirán as súas experiencias rodando nas Rías Baixas e falarán sobre o apoio que presta a Rías Baixas Film Commission ás produtoras.
O sábado será a quenda da comarca do Salnés, con visitas a Vilagarcía, Vilanova de Arousa, Cambados, O Grove e Sanxenxo, e un novo paseo en barco pola Ría de Arousa e A Illa.
Como broche de ouro, haberá unha visita a unha adega da DO Rías Baixas, combinando cinema e viño co mellor sabor local.
E o domingo seguirá a acción con visitas ao castelo de Soutomaior, as Salinas do Ulló en Vilaboa, a cidade de Pontevedra, A Estrada e Silleda. Un percorrido completo que amosa a diversidade de paisaxes e escenarios únicos que ofrece a provincia.
Esta iniciativa está aliñada coa presenza da Deputación de Pontevedra na Shooting Locations Marketplace, un encontro internacional celebrado en Valladolid no que a institución mantivo reunións con produtoras como HBO, Amazon Studios ou Paramount Pictures.
O obxectivo é situar a provincia no mapa do cinema internacional e abrir as portas a futuras rodaxes de gran formato.
Con este tipo de accións, a Deputación quere atraer proxectos audiovisuais que xeren actividade económica, emprego e visibilidade para os concellos pontevedreses.