O sábado sabe e cheira a filloa en Cerdedo-Cotobade. O lugar de Valongo reencontrouse cunha das súas citas gastronómicas máis antigas, a XLV Festa Gastronómica da Filloa.
A elaboración das prestixiosas filloas de Valongo comezou a partir das 18.30 horas e, pouco despois, un público numeroso agardaba xa para a súa degustación no campo das festas.
Baixo unha carpa habilitada pola comisión, e cunha festa amenizada pola actuación da Charanga MIL9, gozaron da destreza na cociña de preto de 30 cociñeiros que colabora para que esta festa gastronómica resulte todo un éxito.
O doce púxose á venda por un prezo de 10 euros a ducia e a cidadanía encheu os ocos dispoñibles.
Á cita non faltou o alcalde, Jorge Cubela, que mantivo un encontro cos responsables da cociña e tamén gozou do sabor das filloas.
Pola noite, a partir das 22:30 horas, a organización programou unha verbena amenizada pola orquestra Favorita e o grupo Distrito 7. Ás 23:55 horas é o momento dunha tirada de fogos de artificio.
Este domingo, 3 de setembro, a partir das 12.00 horas, entregaranse os trofeos da XLV Festa da Filloa de Valongo.
Media hora máis tarde fará entrada a Banda de Gaitas Foula e ás 13:15 horas terá lugar a misa solemne seguida de procesión.