San Marcos inaugura en Marín un novo tanatorio, modelo de acompañamento ás familias

San Marcos inaugurou na tarde deste xoves 9 o seu novo tanatorio de Marín, nun acto que reuniu a representantes institucionais, profesionais do sector funerario e numerosos residentes no municipio.

Na presentación deste novo centro funerario participou a alcaldesa de Marín, María Ramallo; o presidente da Deputación de Pontevedra, Luís López; e o delegado territorial da Xunta de Galicia en Pontevedra, Pablo Fernández, ademais de representantes de distintas administracións, membros da corporación municipal, alcaldes doutros municipios, representantes de diferentes confesións relixiosas e profesionais do sector funerario chegados desde distintos puntos de Galicia e España.

Coa apertura deste novo centro funerario, San Marcos dá un novo paso na evolución da empresa e reafirma a súa aposta por ofrecer ás familias espazos máis humanos, acolledores e adaptados á forma na que hoxe se viven as despedidas. Un proxecto que responde á filosofía que a empresa leva anos impulsando: entender que cada persoa é única e que o seu último adeus tamén debe selo.

Durante o acto, o director de San Marcos, Juan Perdiz, destacou que a inauguración vai moito máis alá da apertura dun novo centro. "Non podemos evitar a dor dunha perda. Pero si podemos acompañar as familias para que ese último adeus sexa máis humano, máis próximo e máis digno".

Unha filosofía que guiou o crecemento da empresa desde aquela pequena funeraria de Aguasantas e que hoxe continúa impulsando unha nova forma de entender o sector funerario.

UNHAS INSTALACIÓNS PENSADAS PARA AS FAMILIAS

O novo tanatorio foi deseñado cun obxectivo moi claro: que as familias atopen unha contorna serena, confortable e respectuosa nun dos momentos máis difíciles das súas vidas.

As novas instalacións responden tamén ao compromiso adquirido cos veciños de Marín, que durante este tempo depositaron a súa confianza en San Marcos mentres a empresa traballaba na transformación deste centro. Con esta inauguración, a compañía pon a disposición do municipio unhas instalacións acordes co modelo funerario que xa implantou noutros dos seus centros.

As novas instalacións contan con tres amplas salas de velorio, concibidas para ofrecer a máxima intimidade e comodidade. Dúas delas incorporan, como elemento diferenciador, un segundo túmulo destinado exclusivamente á exposición floral, permitindo que as mostras de agarimo recibidas polo falecido dispoñan dun espazo propio, integrado e respectuoso dentro da sala.

Un dos espazos máis representativos do edificio é a sala de cerimonias, deseñada para acoller despedidas completamente personalizadas, tanto civís como relixiosas. Un espazo concibido para que cada homenaxe poida adaptarse á historia, as crenzas e os desexos de cada familia. Presidida por un piano de cola branco, a sala reflicte a aposta de San Marcos por cerimonias máis humanas, próximas e emocionais.

Lonxe da imaxe tradicional asociada aos tanatorios, esta nova instalación aposta por unha arquitectura luminosa e acolledora. A entrada de luz natural, os materiais cálidos e as zonas comúns foron deseñados para transmitir serenidade, afastándose de espazos escuros e fríos. O obxectivo foi crear unha contorna que achegue calma, luz e serenidade, facendo que as familias perciban esa acollida desde o primeiro momento.

INNOVACIÓN AO SERVIZO DAS FAMILIAS

A apertura do tanatorio de Marín enmárcase no proceso de renovación que San Marcos vén desenvolvendo nos últimos anos en todos os seus centros. Tras as aperturas e renovacións levadas a cabo en Pontevedra, Poio, Sanxenxo, Meis e o crematorio da Reigosa, a empresa continúa impulsando un modelo funerario baseado na innovación, a personalización das despedidas e a mellora continua da atención ás familias.

Para Juan Perdiz, a evolución do sector funerario debe responder a unha realidade evidente: "As persoas cambian e tamén cambia a forma de despedir a quen queremos. O noso compromiso é evolucionar con elas sen perder os valores que sempre nos definiron".

Con esta inauguración, San Marcos incorpora a Marín un novo espazo concibido para acompañar as familias desde a proximidade, o respecto e a personalización. Unha aposta que mantén vivos os valores cos que naceu a empresa hai case catro décadas e que continúa marcando o camiño da súa evolución.

Este novo tanatorio intégrase dentro do proceso de modernización que San Marcos está a desenvolver en toda a súa rede de centros funerarios, unha estratexia que combina a renovación de instalacións cun novo modelo de atención centrado na personalización das despedidas e o acompañamento ás familias.