Novas medidas para axilizar os accesos e mellorar a experiencia no Bigsound

O Bigsound Festival regresa a Pontevedra os próximos días 17 e 18 de xullo, consolidado como un dos grandes eventos musicais do verán na cidade.

Así o destacou o concelleiro de Festas e Cultura, Demetrio Gómez, durante a presentación dunha cita que, segundo subliñou, "vén darlle un aire novo ás festas" e supón "un salto de calidade" na programación estival.

Gómez sinalou que "é practicamente o único festival deste tamaño que se celebra no centro dunha cidade", á vez que destacou o impacto positivo que ten un evento deste tipo para a hostalaría e o comercio local.

O edil tamén quixo agradecer a colaboración da cidadanía, especialmente dos veciños da zona, polo seu "esforzo e xenerosidade" ante as molestias que pode xerar a montaxe dun evento destas características.

Neste sentido, incidiu na complexidade organizativa dun festival que implica a administracións, forzas de seguridade e numerosas empresas.

Pola súa banda, o responsable da promotora Play Plan, Jordi Lauren, confirmou que a montaxe avanza a bo ritmo desde o inicio dos traballos esta semana e que se introduciron cambios respecto da pasada edición para mellorar a experiencia do público.

Entre elas, destacou a reorganización de espazos, a ampliación de zonas de baños e unha mellor distribución de servizos dentro do recinto.

O festival volverá contar con dous escenarios, un denominado Xacobeo 2027 e outro chamado Pontevedra, como chiscadela á cidade.

A organización prevé superar a asistencia do pasado ano, cando se alcanzaron os 35.000 asistentes, polo que reforzará o dispositivo de transporte con máis rutas e paradas de autobuses. Tamén se manterá o operativo de seguridade coa participación de Policía, Protección Civil e Bombeiros.

Lauren lembrou que a recollida de acreditacións comezará o xoves previo ao festival co obxectivo de axilizar o acceso e mellorar a experiencia do público.

"O ano pasado, entre as 17:00 e as 21:00, acudiron miles de persoas a acreditarse", sinalou. Por iso, a organización anima aos asistentes de Pontevedra a realizar este trámite con antelación para facilitar unha entrada "máis simple e ordenada" nas xornadas principais, ante a previsión de chegada de público de todo o país e mesmo do estranxeiro.