Julio García Comesaña, conselleiro de Sanidade, comunicaba este venres a decisión de suprimir á poboación xeral as corentenas e o rastrexo para contactos estreitos de positivos covid. A medida aplicarase a partir do luns 7 de marzo.
Si se manterá a medida de control nos denominados "ámbitos vulnerables", isto é, espazos como residencias de persoas maiores, centros de día, hospitais, centros para persoas con discapacidade e centros penais.
Carmen Durán Parrondo, directora xeral de Saúde Pública, explicaba a decisión de cambiar o protocolo de vixilancia, aínda que insistía en que o manexo dos casos positivos será o mesmo, de maneira que se lles chamará para preguntarlles polos síntomas, por como deben trasladar a información aos seus contactos directos e posteriormente tamén recibirán unha chamada desde Recursos de Atención Primaria para comprobar a evolución e xestionar a baixa laboral se é necesaria. O que se suprimirá para a poboación xeral será a chamada a contactos estreito, que se realizaba ata o de agora. Estes contactos estreitos non terán que illarse malia que se recomenda que limiten a súa actividade social. Tampouco se realizarán probas diagnósticas agás que estes contactos presenten síntomas da enfermidade.
"Podémonos relaxar? A resposta claramente é non", explicou Durán Parrondo, insistindo na necesidade de que a poboación manteña as normas sanitarias co uso de máscara en espazos pechados e en zonas de aglomeración, hixiene de mans, ventilación dos espazos e vacinación daquelas persoas que aínda non recibisen as súas doses.
O conselleiro manifestou que Galicia "non cambiará de momento" o rexistro de casos positivos xa sexa a través de probas diagnósticas en centros sanitarios, en farmacias ou a través de autotest. O obxectivo, indicou García Comesaña, é ofrecer datos reais.
O máximo responsable da sanidade galega insistiu en pedir "sentidiño" á poboación porque o xoves se detectou un incremento do 26% de casos, este venres un 16% máis respecto ao incremento de onte e a tendencia continúa en ascenso. As autoridades sanitarias relacionan estes casos coas celebracións do Entroido e temen que poidan seguir incrementándose #ante os actos previstos para esta fin de semana. "Os datos destes últimos días non son tranquilizadores", apuntou.
Engade Pontevedra Viva como fonte preferida de Google de balde
Mantente informado coas últimas noticias de actualidade.