Os veciños de Santa Ana e Vilarchán protagonizarán as citas festivas desta fin de semana en Ponte Caldelas.
O 26 de xullo, día de Santa Ana, a xornada amencerá cun pasarrúas a cargo do grupo de pandereteiras As Xeitosiñas que poñerán a nota musical ata as 13 horas en que terá lugar a tradicional Misa Solemne ao aire libre, nas inmediacións da capela, que contará coa participación da agrupación coral Valdarrosa de ponte Caldelas. Tras a misa desenvolverase a procesión acompañada polo grupo de pandereteiras As Xeitosiñas.
O fin de festas estará protagonizado por unha gran verbena amenizada polas orquestras Triunfo e a mediática Panorama que poñerán o broche final a esta celebración dos veciños de Santa Ana.
Esta fin de semana tamén estarán de festa os veciños de Vilarchán que comezarán as súas celebracións en honor á Virxe dos Remedios o sábado 26 de xullo cun pasarrúas matinal a cargo do grupo de gaitas Aires de Ponte Caldelas. A xornada do sábado pecharase cunha gran verbena amenizada polas orquestras Marbella e Televisión.
A xornada do domingo 27 de xullo comezará cun pasarrúas a cargo da Banda de Música Unión Musical de Tenorio para logo dar paso ás celebracións relixiosas que comezarán con misas a partir das 11 horas. A Misa Solemne será ás 13:15 horas seguida de procesión acompañada pola Banda de Música Unión Musical de Tenorio. Ao rematar terá lugar un concerto da citada banda.
Pola tarde, ás 19:30 horas, terá lugar unha Misa Campestre no recinto da festa en honor á Virxe dos Remedios. A continuación celebrarase un espectáculo de baile a cargo do grupo Aires do Norte e Olé e un concerto da Banda de Música Unión Musical de Mullereiro. A xornada rematará cunha verbena protagonizada polas orquestras Chicas Show e Magos de España.
O luns 28 de xullo tomará o relevo matinal o grupo de gaitas Alboradas que serán os encargados de realizar o pasarrúas. Ás 12 horas terá lugar a Misa Solemne en honor á Virxe dos Dolores e ao seu remate haberá unha sesión vermú a cargo do citado grupo de música rexional. Pola noite terá lugar un gran fin de festa coa actuación das orquestras Xerusalén e Xacobeo.