Sanxenxo quenta motores para recibir miles de moteiros

Este fin de semana, Sanxenxo convértese lugar de peregrinación dos amantes das dúas rodas: a Concentración Mototurística Internacional Rías Baixas celebra a súa 37ª edición.

Organizado polo Motoclub Amigos da Moto de Sanxenxo e coa colaboración do Concello, o evento promete atraer a máis de 20.000 moteiros que encherán a chaira de Baltar, centro neurálxico desta gran festa que se desenvolverá desde a tarde do venres até o mediodía do domingo.

Os preparativos xa están en marcha: esta mesma tarde comezará a montaxe do arco de entrada na rúa Rafael Picó e a instalación da gran carpa que acollerá moitas das actividades.

Pero a acción arranca oficialmente o venres ás 17:00 horas, coa apertura de inscricións presenciais, o mercadillo moteiro, terrazas ambientadas con música e os primeiros concertos en directo, unha das grandes novidades deste ano.

Ás 19:00 horas, o ruxir dos motores dará paso ao primeiro pase de stunt, onde os máis valentes mostrarán as súas habilidades sobre as dúas rodas. Xa pola noite, a partir das 22:00 horas, os inscritos gozarán dunha cea na carpa seguida do concerto de Andrés Balado, que abrirá paso a unha auténtica festa moteira con sorteos e agasallos.

O sábado 13 arranca ás dez da mañá con almorzo para os participantes e nova apertura de inscricións. Pola tarde, desde as 16:00 horas, volve o mercadillo, as terrazas e a música, cun potente cartel de concertos: Rock and Prol, Smoke, JJ Compota e Eme Music.

As acrobacias volverán ser protagonistas con dous novos pases de stunt ás 19 e ás 00:00 horas, antes e despois da cea para os inscritos. E, por suposto, a festa seguirá con máis sorteos e diversión.

O domingo comeza tamén con almorzo, e a partir das 11:00 horas prepararase a tradicional excursión pola comarca, que arrincará ás 11:30 horas. Espérase o regreso sobre as 13:30 h, momento no que se servirá a comida.

A clausura chegará coa entrega de trofeos e sorteos, recoñecendo ao Motoclub con máis inscritos (nacional e internacional), ao moteiro de maior idade e ao que veña desde máis lonxe.

Para garantir que todo transcorra con normalidade, a Policía Local e a Garda Civil encargaranse de controlar o tráfico e a contorna do recinto. A rúa Rafael Picó reservarase desde o venres exclusivamente para motos. Desde a organización faise un chamamento á prudencia e responsabilidade durante todo o evento.

Ademais, como parte do compromiso social, o Concello habilitará un Punto Violeta nas inmediacións do Centro de Saúde de Baltar, dispoñible de 20:00 a 23:00 horas os días 12 e 13 de setembro. Un espazo de apoio, información e sensibilización ante calquera situación de violencia machista ou sexista.