Os concellos de Sanxenxo e Poio analizan a posibilidade de acceder de xeito conxunto a fondos europeos destinados ao desenvolvemento sostible das entidades locais en materia medioambiental, económica e social.
Os alcaldes de ambos municipios, Telmo Martín e Ángel Moldes, mantiveron esta semana unha xuntanza de traballo na que tamén participaron as concelleiras María Deza e Rocío Cochón.
O obxectivo do encontro foi valorar proxectos conxuntos cos que poder optar a plans europeos, ben sexa para municipios de máis de 20.000 habitantes ou, no seu defecto, para unión de concellos que, sen superar esta poboación, presenten propostas comúns.
A iniciativa busca aproveitar os recursos económicos que ofrece a Unión Europea para determinadas propostas.
Esta iniciativa dos dous alcaldes do Partido Popular busca a colaboración entre ambos municipios limítrofes da comarca do Salnés, coa intención de potenciar as súas posibilidades de acceso a estas liñas de financiamento comunitario a través dunha estratexia compartida.