Os Reis Magos tamén farán unha parada en Sanxenxo durante a súa ruta polas Rías Baixas antes da noite máxica do 6 de xaneiro. Chegarán á vila ás 17.00 horas para unha recepción na que atenderán a todos os nenos que se acheguen ao pavillón de Baltar e, a continuación, percorrerán as rúas de Sanxenxo e Portonovo nunha gran cabalgata.
As carrozas sairán ás 19.00 horas do pavillón e percorrerán as rúas Areal, Lalinde del Rio, Mariña e Rafael Pico para dirixirse posteriormente cara a Sanxenxo, entrando pola rúa Progreso, avenida de Madrid e Paseo de Silgar, ata a intersección coa avenida Luís Rocafort.
Durante o seu percorrido, Melchor, Gaspar e Baltasar repartirán un total de 1.500 quilos de caramelos entre os nenos. Do mesmo xeito que en anteriores edicións, os doces que se distribuirán entre os asistentes carecerán de ingredientes e aditivos con glute nin derivados do mesmo. Así, todos os pequenos, aínda aqueles que padezan a enfermidade celíaca, poderán gozar das diferentes paradas que realizarán as carrozas.
Ás 17.00 horas do martes 5 tamén haberá cabalgata en Vilalonga. Os Reis Magos sairán do centro da vila e visitarán aos nenos de Gondar, Piñeiros, Costiña, Lagarei, Rouxique, Arnosa, Salgueira e no pavillón.
A visita dos Reis Magos a Sanxenxo incluirá unha cabalgata en Dorrón que partirá ás 17.30 horas de Magaláns; outra en Noalla ás 18.00 horas con saída da carballeira; e unha en Nantes con saída desde a Igrexa ás 18.00 horas.
O mércores día 6, a cita será ás 11 horas en Aios onde Melchor, Gaspar e Baltasar partirán da capela para percorrer as principais rúas do lugar. Máis tarde, a partir das 13.00 horas, a Escola de Educación Infantil de Aios acollerá a representación dun Belén Vivente organizado pola Asociación Xuvenil Os Raposos.