A contorna da torre da Lanzada transformarase nun espazo vivo da Idade Media. Será no transcurso da primeira edición da festa medieval A Lanzada na Historia, que se celebrará neste enclave os días 20, 21 e 22 de xuño.
O evento, organizado polo Concello de Sanxenxo, pretende pór en valor a tradición e rememorar parte da historia deste lugar, segundo destacaron a concelleira de Cultura, Elena Torres, e membros da comisión de festas da Lanzada.
"Con esta festa, queremos destacar a historia, o patrimonio e a tradición dun lugar excepcional, onde conviven arqueoloxía, cultura popular e lendas", explicou Torres.
Así, durante tres días, A Lanzada ofrecerá un mercado tradicional, espectáculos de música, teatro, xogos populares e recreacións históricas nun ambiente festivo e participativo.
O ambiente festivo comezará o venres, ás 16:00 horas, co mercado medieval, pero non será até as 16:30 horas cando se inaugure o evento coa lectura do pregón a cargo da concelleira de Educación e veciña da parroquia, Nati Parada.
A continuación, haberá animación musical con Os do Barro. Pola noite, a partir das 21:30 horas, haberá actuación musical de Os Firrás e ás 23:30 horas queimada tradicional.
As actividades retomaranse o sábado, ao dez da mañá, co mercado medieval. Ás 11:00 horas, haberá tiro con arco e ás 13:00 horas, a actuación musical de Arroba de Viño.
Xa pola tarde, ao catro, organizaranse xogos populares, entre eles tirasoga, carreira de sacos e carreira de carretas, ao seis haberá un torneo de loita medieval e a partir das 21:30 horas un concerto de A banda do Sequío.
Haberá ademais, ás 23:30 horas, unha representación do rito das nove ondas e durante todo o día haberá unha noria e paseos en barca, entre outras actividades.
E o domingo, último día desta primeira edición da Lanzada na Historia, estará aberto o mercado medieval e haberá a actuación musical de Arroba de Viño ás 13:00 horas.
"Agardamos que A Lanzada na Historia se consolide ano tras ano como unha cita imprescindible nas Rías Baixas", subliñaron os organizadores, que pediron aos asistentes acudan "vestidos para a ocasión" para gozar desta nova proposta cultural.