O Concello de Sanxenxo prepara o reforzo da Policía Local para os meses de verán, nos que tradicionalmente se multiplica a súa poboación.
Neste sentido, e por segundo ano consecutivo, organizou un proceso de selección para incorporar 26 auxiliales de Policía Local.
O obxectivo deste proceso é garantir na medida do posible un maior coñecemento do termo municipal e das necesidades do propio corpo tendo en conta as características especiais de Sanxenxo.
Á convocatoria apuntáronse 82 persoas, aínda que finalmente só se presentaron 73 aspirantes.
O proceso constaba dunha parte teórica e outra práctica.
Os auxiliares pasarán a reforzar entre os meses de xuño e setembro o persoal fixo da Policía Local, formada por 23 policías e 5 auxiliares fixos descontinuos.
Os aspirantes superaron tres probas incluídas no proceso de selección: Un cuestionario de 50 preguntas tipo test, unha proba de coñecemento de galego e outra centrada nas súas aptitudes físicas.
Agora, os que pasaron o proceso de selección deben completar un curso teórico-práctico obrigatorio, impartido pola Agasp, para poder ser contratados, e que consta de 24 horas presenciais.
As probas prácticas realizáronse no campo de fútbol de Baltar e as teóricas, no salón de actos do Auditorio Emilia Pardo Bazán.
Informa o Concello de Sanxenxo que os primeiros 13 auxiliares de policía incorporaranse o 15 de xuño ao servizo, mentres que os outros 13 farano a partir do 1 de xullo.