A praia da Panadeira recuperou este mércores unha bandeira azul que levaba máis dunha década sen lucir no areal. Este ano, o Concello de Sanxenxo recuperou a distinción e este mércores realizouse o acto oficial de izado, no que o alcalde, Telmo Martín, destacou o logro de poder recuperala.
Martín destacou que na praia da Panadeira ondean dúas bandeiras, a azul concedida por ADEAC (Asociación De Educación Ambiental y del Consumidor) e a branca que representa que este areal é libre de fumes.
En total, Sanxenxo ten este ano 14 bandeiras azuis, sendo un ano máis o municipio español con máis distincións. De todos os xeitos, a cifra non satisfai do todo ao alcalde, que se marca como obxectivo obter 16.
Así, aspira a recuperar as bandeiras en dúas praias que "se nos resisten", Area de Agra e Nanín. Asume que non poderá ser de fronte ao próximo ano, pero si en breve. "Canto antes poida ser, mellor", insiste.
O goberno local seguirá traballando para lograr esas dúas distincións porque, tal e como destaca o alcalde, "Sanxenxo segue apostando polas bandeiras azuis, polos socorristas, polos sanitarios, pola limpeza nas praias, por acceso para discapacitados, por baños....".
Ademais, destaca que o municipio "segue crecendo" e en tempada estival "segue sendo líder en toda España"