A Consellería de Sanidade comunicou a última hora deste xoves catro novos falecementos en Galicia de persoas diagnosticadas de coronavirus.
Entre elas atópase un home de 66 anos que se atopaba ingresado no Complexo Hospitalario Universitario de Pontevedra (CHOP), e que faleceu durante a xornada do 15 de decembro.
Trátase da segunda vítima esta semana na Área Sanitaria de Pontevedra e O Salnés, tras a notificada o martes día 14, unha muller de 78 anos que evolucionaba en Montecelo.
Con eles a cifra de mortes de pacientes con positivo activo por covid ascende a 214 na área sanitaria desde o inicio da pandemia.
En canto ao resto de falecementos confirmados por Sanidade, dúas persoas, home e muller de 88 anos, faleceron no Complexo Hospitalario de Ourense e un home de 74 anos fíxoo en Vigo.
Todos eles, sinala o Servizo Galego de Saúde, presentaban patoloxías previas.