Ata dezasete persoas foron denunciadas pola Policía Local de Pontevedra por participar nun botellón que os axentes disolveron en Pontevedra.
Foi na véspera de Noiteboa, na tarde do pasado 23 de decembro. Estes mozos estaban a beber na vía pública, concretamente na Ribeira dos Peiraos.
Esta foi a principal intervención policial nestes días festivos, nos que se estableceron diferentes controis no mercado de abastos, a zona comercial, as inmediacións dos supermercados e nas zonas de lecer.
Nas noites do 23 e 24 de decembro, a Policía Local participou en controis conxuntos por Pontevedra xunto a efectivos da Policía Nacional e da Policía Autonómica.
En total, foron denunciadas sete persoas (cinco delas en Noiteboa) por traspasar o peche perimetral de Pontevedra sen causas xustificadas.
Ademais, na tarde do día de Noiteboa houbo un operativo especial de control na Praza da Verdura, sen que se detectaran infraccións.