Ata 29.000 euros recibirá o Concello de Soutomaior a través dunha subvención de Turismo de Galicia, un investimento que estará destinado a incrementar e mellorar os recursos turísticos do municipio, en concreto de toda a fachada marítima de Arcade.
O proxecto aprobado consiste nunha actuación de sinalización e creación de contidos interpretativos nas marxes do sendeiro que percorre a ribeira do río Verdugo, a súa desembocadura e a enseada de San Simón, dentro da parroquia de Santiago de Arcade.
En concreto, o tramo de 1.270 metros sobre o que se propón actuar é o que transcorre entre o peirao de Arcade e a ponte histórica de Ponte Sampaio sobre a que pasa o Camiño Portugués a Santiago e que marca o límite co municipio de Pontevedra.
Este proxecto implica, por unha banda, a instalación de seis sinais de carácter interpretativo nas beiras dun sendeiro de terra xa existente e, por outra, a creación de contidos interpretativos (texto e imaxes) para incorporar aos sinais e á web municipal.
Para a concelleira de Turismo, Silvia Cernadas, esta axuda permitirá "actualizar e preparar unha zona especialmente turística" para que tanto a veciñanza como os visitantes "poida gozar desta contorna nas mellores condicións".
O proxecto, que se converterá nunha realidade a finais deste ano, busca mellorar a calidade da experiencia dos visitantes sinalizando os principais recursos turísticos da zona por onde transcorre a senda e mellorar a experiencia e alternativas de visita dos turistas.
Ademais, pretende habilitar unha nova alternativa de ocio aos peregrinos que se achegan polo Camiño Portugués e dotar a Arcade dunha infraestrutura de calidade orientada tanto ás actividades de ocio como ao exercicio físico e ao coñecemento da contorna natural e cultural.
Unificar e modernizar a sinalética dos recursos turísticos, promover o coñecemento e respecto polo patrimonio histórico e cultural de Arcade ou destacar a importancia ambiental de todo este ámbito completan as liñas de traballo desta actuación.
Engade Pontevedra Viva como fonte preferida de Google de balde
Mantente informado coas últimas noticias de actualidade.