A Illa do Covo foi testemuña este fin de semana da exitosa clausura do festival Surfing the Lérez, que no seu segundo e último día fixo vibrar a miles de asistentes.
Con catro escenarios diferentes e máis de 120 persoas traballando na organización, o festival, sen dúbida, superou o éxito de pasadas edicións, con outro cheo total e actuacións que non deixaron indiferente a ninguén.
A xornada arrincou con forza ás 13:00 horas co grupo Liorta, do que forma parte o triatleta Javier Gómez Noya. Despois, Ortiga volveu cativar ao público creando unha auténtica festa.
A mañá tamén contou coa presenza de artistas como Capital Voskov, Bea Fernandes, Portrait e Boyanka Kostova.
Xa pola tarde, desde as 17:00 horas, chegou a quenda de Trashi, Dj Amable, Jarabo, As Dianas, Melifluo, Señora DJ, Karavaba, Dj Diñeiro e Santi Araújo, que prepararon o ambiente para o que estaba por vir coas cabezas de cartel.
Alba Reche, Ángel Stanich, Arizona Baby e Grande Amore deixaron pegada nun público entregado que non deixou de bailar até pasadas as 3:00 horas, cando Cora Yako, BB Wav B2b Elba, Levitantis, Grima e Gorllitox puxeron fin a outro exitoso Surfing the Lérez.
Máis aló da música, o evento consolidou a súa reputación como unha gran celebración comunitaria ao aire libre, marcada por un ambiente familiar e a solidariedade, mantendo o seu compromiso coa tradicional recollida de alimentos en colaboración con Rede Axuda.