Susto en Benito Corbal por un suposto incendio nun garaxe que non existía

Un amplo despregamento dos servizos de emerxencia alterou a tranquilidade que se vivía este sábado na rúa Benito Corbal de Pontevedra.

Atendían un aviso por un incendio no garaxe do edificio número 62, que chegaba desde o 112 Galicia sobre as dúas e media da tarde.

Até o lugar desprazáronse varias unidades dos bombeiros de Pontevedra, patrullas da Policía Local e voluntarios de Protección Civil.

Pero todo resultou ser unha falsa alarma.

Así o confirmaron desde o Concello de Pontevedra, que subliña que nun primeiro momento pensouse que había un coche ardendo no nivel -3 do garaxe.

Esta incidencia levou aos membros do operativo a cortar o tráfico nas rúas adxacentes, para evitar que os coches accedesen a este punto da cidade.

Ademais, chegouse a avisar aos residentes dos edificios lindeiros por seguridade.

Pero ao entrar no garaxe, os bombeiros comprobaron que non había rastro do incendio.

Si cheiraba a queimado, polo que os investigadores sospeitan que esta falsa alarma estivo provocada polo fume dun vehículo que queimaba mal e que estaba no interior.

En todo caso, o operativo retirouse ao comprobar que non había indicio algún do lume.