A decisión da familia propietaria da metade dos baixos das galerías comerciais da rúa Oliva de recorrer a sentenza que descarta reabrir o paso cara á rúa Gutiérrez Mellado ten reaccións totalmente enfrontadas entre as partes implicadas.
Así, mentres os comerciantes desta zona comercial confirman que están "moi contentos", o axente inmobiliario Javier Tovar, intermediario no proxecto para o edificio situado entre as rúas Michelena e Gutiérrez Mellado, considérao "absolutamente" un erro.
Este axente inmobiliario fai esta valoración tan negativa do recurso desde o punto de vista da recuperación comercial das galerías, pois considera que darlle unha nova vida a esta zona "pasaría pola operación proxectada que tiña Zara".
A multinacional Inditex tiña en marcha un proxecto para crear unha gran tenda neste solar, pero a finais de 2024 renunciou a continuar coa tramitación da licenza no Concello de Pontevedra. Estaban pendentes deste posible recurso e, unha vez que se confirmou, este axente inmobiliario confirma que "descartou a continuidade".
Ese proxecto de Zara implicaría a apertura dunha porta á tenda polas galerías Oliva, de modo que suporía convertelas en zona de paso, recuperando ese paso perdido cara a Gutiérrez Mellado. "Suporía un paso a través da súa tenda nun horario comercial moi amplo", confirma Tovar.
Agora, para ese solar, hai un novo proxecto inmobiliario en marcha do que Tovar descarta confirmar detalles. Si constata que esa parcela ten, no Plan Xeral de Ordenación Municipal, "destino residencial", de modo que esa nova operación implica "vivendas, locais e prazas de garaxe".
No caso de Inditex, xa ten en marcha tamén "un proxecto novo". Encargoullo Inditex tamén a este intermediario e "xa está iniciado". Aínda que non pode facilitar detalles, si está convencido de que "se axusta ao que está a buscar Zara".
SATISFACIÓN ENTRE OS COMERCIANTES
Javier Tovar insiste en que "o desgaste das galerías vén de atrás" e a sentenza pola que o Xulgado de Primeira Instancia número 1 de Pontevedra desestimou a demanda na que solicitaba que se restituíse o pleno uso do acceso desde Gutiérrez Mellado non tivo nada que ver coa súa situación, pero os comerciantes si o relacionan directamente.
Tovar fala de que "había moitos locais buxán" e sinala: "non vexo no horizonte próximo unha recuperación das galerías". Por iso é polo que considere "difícil de entender que se alegren de que haxa recurso".
Os comerciantes pola súa banda, tomaron "extraordinariamente ben" a noticia do recurso. Antonio Santiago, presidente da asociación que os engloba, lembra que "nós loitamos polo noso camiño de paso, non por que veña un Goliat", en alusión a Zara.
Ademais, lembra que nestas galerías hai entre 60 e 75 autónomos que viven da actividade comercial e que o recurso, presentado o pasado venres, supón "loitar por un camiño de paso para o pobo de Pontevedra e para os comericantes".