A esperada reforma urbana de Casimiro Gómez xa está en marcha. Fíxoo cos primeiros traballos de fresado no pavimento e, a partir deste luns, intensificaranse.
Para esta primeira fase de obras, haberá que pechar ao tráfico o tramo que vai desde San Antoniño até Pai Fernando Olmedo. Xa non se poderá circular por ela desde o luns.
O Concello activou un plan de mobilidade especial para compaxinar o desenvolvemento dos traballos, entre seis e oito meses, coa circulación ordinaria.
A dirección e o sentido actual da circulación no resto da vía, é dicir entre San Antoniño e Loureiro Crespo, manteranse sen cambios.
O proxecto supón unha intervención sobre un trazado de 185 metros de lonxitude, cunha superficie total de actuación de 2.665 metros cadrados.
Os traballos concéntranse na mellora da calidade do espazo urbano mediante a eliminación de barreiras arquitectónicas e a potenciación da accesibilidade peonil.
En concreto, habilitaranse beirarrúas de dous metros de ancho e instalaranse pasos de peóns elevados á cota das beirarrúas. Haberá ademais un pavimento podotáctil diferenciado para facilitar o tránsito de persoas con dificultades visuais.
A ampliación do espazo peonil implicará unha redución das prazas de estacionamento, aínda que se habilitarán novas prazas destinadas especificamente a persoas con mobilidade reducida.
O deseño complétase coa colocación de novo mobiliario público, como bancos, papeleiras e aparcabicicletas, e coa plantación de cerdeiras silvestres.
A intervención inclúe tamén a renovación de todos os servizos básicos soterrados, unha das actuacións máis urxentes debido ás recorrentes roturas que sofren as actuais canalizacións de auga potable feitas de fibrocemento.
O novo deseño implementará redes separativas de saneamento para pluviais e residuais, ademais de actualizar os tendidos de electricidade, gas e telecomunicacións.
Igualmente, substituirase toda a iluminación pública por un sistema bilateral eficiente dotado con balizas de seguridade peonil nocturna nos pasos de peóns.
Esta reforma integral adxudicouse á empresa EC Casas por case 948.000 euros e conta cun prazo global de execución de doce meses.
Engade Pontevedra Viva como fonte preferida de Google de balde
Mantente informado coas últimas noticias de actualidade.