A caseta de turismo de Sanxenxo deixa de estar situada na rotonda que dá acceso á Vía Rápida. Operarios municipais trasladaron esta mañá o punto de atención ao público, debido ás obras e movementos de terra que se están a realizar actualmente nese ámbito.
A nova situación escollida por Turismo de Sanxenxo para ofrecer este servizo encóntrase ao lado da fonte de Fontoira, onde, segundo explicou a concelleira delegada desta área, Almudena Aguín, o Concello de Sanxenxo habilitará unha rampla de acceso e a correspondente sinalización viaria de estacionamento para persoas con mobilidade reducida.
"Trátase igualmente dunha localización idónea para ofrecer servizo aos visitantes cando acceden ao noso municipio mediante os seus vehículos e que xa poden formular as súas consultas nada máis entrar en Sanxenxo", explicou a edil de Turismo.
Aínda que a caseta é de titularidade municipal, seguirá sendo persoal do Consorcio de Empresarios Turísticos de Sanxenxo (CETS) o que se ocupará de atender ao público, en virtude do acordo de colaboración existente entre ambas as dúas partes.