Tres alumnas do IES Sánchez Cantón, seleccionadas na segunda fase dun concurso europeo

Un proxecto de tres alumnas do IES Sánchez Cantón de Pontevedra para desenvolver un sistema de estirilización de material e espazos sanitarios para países do terceiro mundo chegou á fase final dun concurso europeo. A proposta é actuar mediante o uso de LEDs ultravioleta alimentados por un panel solar.

Segundo informou un dos profesores do centro, as alumnas que puxeron en marcha o proxecto son Nuria Sueiro Martínez, Sandra García Pérez e Sara van Dinter Beloso. Participaron nun proceso de selección no que pasaron a unha segunda fase xunto con outros cinco proxectos. Nesta segunda fase, serán premiados tres proxectos dos seis.

Esta segunda fase de selección inclúe unha videoconferencia na que as alumnas defenderán o seu proxecto ante un xurado de STEM4YOUTH. Ademais, a organización habilitou un sistema de votación en liña para que todo aquel que queira poida votar un proxecto dos seleccionados.

Para votar o proxecto das estudiantes do IES Sánchez Cantón, só hai que escribir un correo electrónico, seleccionar o seu proxecto (Team F - LED torch spotlight) e confirmar a votación mediante un enlace que se remite o correo electrónico.

O concurso europeo no que están a participar está organizado polo proxecto Horizon 2020 STEM4YOUTH e o premio consiste nunha viaxe a Xenebra para visitar o acelerador de partículas situado na Organización Europea para a Investigación Nuclear (CERN, sigla que corresponde ao seu antigo nome en francés: Conseil Européen pour a Recherche Nucléaire).