Galicia volve estar de luto. O mar cobrouse novas vítimas. O barco pesqueiro "Sin Querer Dos", con base en Portonovo, naufragou este mediodía a 4,5 millas ao sur de cabo Fisterra. Salvamento Marítimo recibiu a alerta da radiobaliza ás 13:49 horas.
A bordo da embarcación había 10 tripulantes. Tres dos pescadores faleceron. Son, segundo os datos oficiais, Teófilo Rodríguez, Bernardo Padín y Manuel Serén, o patrón do pesqueiro, un home de ampla experiencia no mar. Todos eles son veciños de Cambados.
Desta localidade tamén é Guillermo Casais, o mariñeiro que segue desaparecido. A súa procura, por agora, foi infrutuosa. Outras seis persoas foron rescatadas e foron trasladadas aos portos de Muros e Fisterra. A maioría deles presentaba hipotermia e recupéranse en diferentes centros hospitalarios.
Segundo informou Salvamento Marítimo, o naufraxio mobilizou o helicóptero Helimer 401, o buque Salvamar Régulus e varios pesqueiros que estaban na zona (Hermanos da Silva e Miera da Costa) que rescataron as seis persoas con vida de dúas balsas salvavidas. O Helimer recuperou un cadáver e Salvamar os outros dous.
Coa chegada da noite, suspendeuse ata mañá a busca por aire do mariñeiro que continúa desaparecido. Na zona permanece a embarcación Don Inda de Salvamento Marítimo, que continuará coas labores de sondaxe durante toda a noite
O buque accidentado é o "Sin Querer Dos", unha embarcación do cerco construída no ano 1996 e que actualmente é propiedade da firma Pescados Vixa, da empresa Francisco Muñiz e Hijos, S.A. con sede en Meaño.
A conselleira de Mar, Rosa Quintana, explicou que o cerqueiro regresaba a Portonovo tras finalizar a súa campaña de pesca no Cantábrico. As cartas de navegación descartan que o barco chocara contra as rocas.
Engade Pontevedra Viva como fonte preferida de Google de balde
Mantente informado coas últimas noticias de actualidade.