O Subsector de Tráfico da Garda Civil de Pontevedra utiliza, durante este verán, un camión camuflado de cores comerciais nas estradas da provincia para detectar condutas que sexan un risco para a seguridade doutras persoas nas vías.
Apoiado por outros vehículos oficiais rotulados, desde este camión vixíase o uso do teléfono móbil polos condutores e outras distraccións tanto en turismos como en vehículos pesados e autobuses.
Segundo a Garda Civil, o obxectivo é previr e reducir a sinistralidade que se deriva desas distraccións na condución.
Ao tratarse dun vehículo no que a posición é máis elevada detéctanse un maior número de infraccións ao volante e permite vixiar esas condutas en furgonetas, camións e autobuses, que desde un vehículo oficial resulta máis difícil observar.