O proceso de vacinación contra a covid-19, que adoita desenvolverse de maneira bastante áxil, atopouse este xoves cunha dificultade inesperada. Un erro informático colapsou o sistema e xerou longas colas no 'vacinódromo' de Pontevedra.
Desde o Servizo Galego de Saúde recoñecen que a plataforma que aloxa o sistema de vacinación quedou inactiva e, aínda que se puido seguir vacinando durante o tempo que estivo caído, o paso dos pacientes fíxose a un ritmo máis baixo.
Os responsables dos puntos de vacinación tiveron que facer un rexistro das persoas para vacinar de maneira manual, ata que se resolveu o problema.
Ás portas da delegación da Xunta en Pontevedra, o punto no que o Sergas está a inxectar actualmente a terceira dose aos maiores de 40 anos, acumuláronse as persoas citadas sen que, debido a ese erro informático, puidesen entrar á hora prevista.
A incidencia detectouse sobre as once da mañá e quedou emendada dúas horas despois.