O Concello de Cerdedo-Cotobade acaba de destinar un investimento de 56.000 euros a mellorar tres viais de titularidade municipal no lugar de Calvelle, na parroquia de Aguasantas.
O alcalde, Jorge Cubela, supervisou os últimos traballos levados a cabo nestes camiños e lembrou que estas tres intervencións forman parte do compromiso adquirido coa veciñanza de Calvelle e que suporá unha mellora no acceso ás vivendas desta zona de Aguasantas.
Con estas actuacións, buscouse dar resposta positiva ás necesidades que plantexa a poboación. "Ímolas acometendo todas a medida que podemos atendendo as máis urxentes e tamén traballando en función da dispoñibilidade económica", explica Cubela, que insiste en que "somos xente de palabra e temos un equipo preparada para xestionar tanto as grandes obras, servizos e investimentos como os problemas que afectan de xeito cotián á xente".
Nun camiño, o Concello acometeu o pavimentado de aglomerado en quente ao longo duns 250 metros dun vial de titularidade municipal no que tamén se realizou a reposición do firme e se acometeu os distintos enlaces ás vivendas así como o retranqueo e o sobreancho dun muro cunha lonxitude aproximada duns 25 metros.
Noutro camiño, a intervención consistiu na construción de cunetas, cunha lonxitude aproximada duns 100 metros, para canalizar as augas pluviais e mellorar a drenaxe da zona para solucionar graves problemas de inundación derivados das intensas choivas que se producen na época de outono e inverno.
A terceira das intervencións centrouse no ensanche dunha pista de acceso entre vivendas duns 50 metros de lonxitude e cun ancho duns 4 metros co cal se facilita en gran medida o acceso de vehículos de emerxencias para poder intervir en caso de que sexa necesario.