Os avogados pontevedreses gardaron este venres un minuto de silencio para lembrar a Fernando Romay Graña, letrado pontevedrés falecido xusto unha semana antes no seu domicilio da cidade.
A homenaxe dos seus compañeiros de profesión realizouse durante o acto de toma de posesión da nova Xunta de Goberno do Colexio Provincial de Avogados na sede colexial da avenida Raíña Vitoria, no que estivo presente a presidenta do Consello Xeral da Avogacía Española, Victoria Ortega Benito.
Victoria Ortega presidiu a mesa e inaugurou o emotivo acto co que Ramón Jáudenes López de Castro encara o seu segundo mandato como decano do Colexio. Este venres xuraron ou prometeron o cargo el e o resto de elixidos tras o último proceso electoral no órgano colexial: Juan Carlos Abeigón Vidal como deputado primeiro, Juan Ramón Piñeiro Bermúdez como deputado terceiro, Isabel Sueiro Torres como deputada cuarta; María Pilar Moledo Santiago como deputada sexta e Gema Rial Rodríguez como bibliotecaria-contadora.
Ademais, o acto tamén serviu para impoñer a Medalla ao Mérito no Servizo da Avogacía ao letrado Juan Areses Trapote. O Pleno do Consello Xeral da Avogacía Española concedeulla a petición da Xunta de Goberno do Colexio polos seus innumerables méritos tanto a nivel profesional como persoal.