Veciños do lugar de Meán, en Tilve, reclaman á concelleira delegada da parroquia de Cerponzóns, Pilar Comesaña, unha solución para o conflito que se orixinou coa construción dun muro de formigón na obra do Centro Social que ocupa parte da calzada.
Estes veciños residentes en San Vicente de Cerponzóns manifestaban durante os últimos días a súa oposición a este traballo ao entender que dificultará a circulación de vehículos nesta zona provocando graves problemas para que os camións de grandes dimensións poidan transitar por este espazo.
Desde a asociación O Chedeiro afirman que, desde a presentación do proxecto, opuxéronse a esta construción do muro de formigón. O seu rexeitamento non foi considerado pola maioría de veciños que agora viron nesta infraestrutura un problema para o lugar.
Os veciños reclaman, en lugar deste muro, a construción dunha zona de aparcadoiro na zona.