Un can de raza perigosa que levaba boceira, pero non estaba atado con correa, atacou na noite deste martes a outro can e tamén á dona que acudiu a separalos. Ocorreu sobre as 20.30 horas na zona axardinada da rúa Alfredo García Hermida, nas inmediacións do mercado municipal de Pontevedra.
A vítima, unha moza veciña da zona de 23 anos, chamou á Policía Local e relatou o que ocorrera. Estaba a pasear ao seu can nesa zona axardinada cando se lle achegou un can de raza pitbull e abalanzouse sobre a súa mascota.
Segundo o relato da vítima, mordeulle no pescozo e a coxa e, cando ela acudiu para separalos, tamén a atacou. No seu caso, mordeuna no dedo polgar da man dereita.
O can atacante levaba a boceira obrigatoria para os cans de raza potencialmente perigosa, pero estaba solto. Ademais, a boceira non impediu que mordese ao outro can e a nova.
Segundo confirmou a Policía Local de Pontevedra, o dono do can está localizado e é tamén un veciño da zona. O animal está considerado de raza perigosa e, segundo fontes policiais, ten todos os papeis en regra.
Coa declaración da vítima, a identificación do dono do can e todos os datos recollidos no lugar dos feitos, a Policía Local redactou un informe que remitiu á Policía Nacional. Agora a súa tramitación queda pendente de que a moza atacada presente denuncia na Comisaría.
De momento, a última hora da mañá deste mércores non a formalizara, segundo confirmaron desde a Comisaría Provincial.