O novo é separar. Ese é a lema da nova campaña informativa que impulsará o Concello de Pontevedra para ensinar á cidadanía a separar correctamente os residuos que se deben depositar en cada un dos contedores.
"Imos saír á rúa ao grande", sinalou o edil Xaquín Moreda, xa que a campaña instalará de forma moi visible os contedores correspondentes ás cinco fraccións: papel/cartón, envases, vidro, biorresiduos e fracción resto.
Xunto a eles, habilitarase unha carpa onde se ofrecerá material informativo detallado sobre o proceso de separación e a compostaxe e, o máis novidoso, unha especie de 'ruleta da sorte' para aprender xogando.
A través desta interacción "proactiva e dinámica", indicou Moreda, proporase un xogo a quen se achegue: unha ruleta de cores con preguntas onde os participantes terán que demostrar os seus coñecementos en materia de residuos.
Todas as persoas que participen recibirán un agasallo consistente en merchandising da campaña e material extra de apoio para reforzar a idea da reciclaxe en casa.
Ademais das accións a pé de rúa, a campaña -desenvolvida en colaboración coa empresa concesionaria do servizo, PreZero- contará cunha vertente paralela e específica nas redes sociais.
Esta acción dixital centrarase en fomentar o uso do contedor marrón, destinado aos biorresiduos, resolvendo as dúbidas que poidan existir acerca do seu uso.
Aínda que os cidadáns xa están familiarizados cos composteiros comunitarios e as outras catro fraccións (amarela, verde, azul e resto), o Concello quere profundar no correcto uso do contedor marrón, en fase de implantación en diversas rúas.
Durante esta primeira fase, a campaña estará na Praza de Ourense (22 de xuño), o mercado (23 de xuño), a pasarela José Adrio (25 de xuño), a Praza de Europa (26 de xuño), a Praza de España (29 de xuño) e o Parque da Constitución (30 de xuño).
Tras unha pausa estival a actividade retomarase no mes de setembro, xusto despois da celebración da Feira Franca.
O goberno municipal lembra que, para máis información sobre a xestión dos residuos na cidade, habilitouse a páxina web residuos.pontevedra.gal.