O concelleiro de Infraestruturas, César Mosquera, informou este martes dos primeiros resultados dunha estratexia que combina a asistencia técnica aos grandes produtores coa man firme da Policía Local ante os incumprimentos máis evidentes do lixo.
Entre o 1 de xaneiro e o 22 de abril, o servizo de inspección tramitou un total de 16 denuncias por infraccións graves, con multas que oscilan entre os 750 e os 1.500 euros.
Esta ofensiva contra o mal uso dos contedores de residuos non busca, en palabras do edil, perseguir o pequeno erro do cidadán particular, senón corrixir comportamentos "aberrantes" e realizados por "pura comodidade" que prexudican o esforzo colectivo.
As denuncias tramitadas nestes primeiros meses do ano afectan a sectores moi diversos. Segundo detallou Mosquera, o rexistro inclúe a centros médicos sanitarios, clínicas veterinarias, restaurantes, empresas de obras, un bazar e mesmo un caso dun particular.
A tipoloxía das infraccións amosa unha falta de civismo que Mosquera cualifica de inaceptable con estes casos para tramitar:
-
Abandono de residuos (7 casos): Bolsas depositadas fóra dos colectores a pesar de que estes, nalgúns casos, se atopaban baleiros. Nunha das situacións, un particular negouse a recoller o lixo tras ser instado a facelo.
-
Separación incorrecta grave (8 casos): Situacións onde se mesturaron materiais de xeito incompatible, como a vertedura de entullos de obra en colectores de papel ou vidro, ou o depósito de capachos de vidro no contedor marrón destinado aos biorresiduos.
-
Limpeza de espazos (1 caso): Unha sanción vinculada á falta de limpeza dunha terraza tras os avisos previos.
Malia que Mosquera evitou dar nomes concretos por cuestións de protección de datos e "dignidade" administrativa, subliñou que algunhas destas situacións son especialmente destacable dada a natureza da actividade profesional dos implicados.
Unha das novidades máis salientables neste novo escenario de control é a colaboración activa do persoal de PreZero, a empresa concesionaria do servizo de limpeza.
Máis dun centenar de operarios que traballan a diario a pé de rúa están a dar aviso á Policía Local cando detectan infraccións graves.
Para o concelleiro, este apoio é fundamental, xa que os traballadores son quen mellor coñecen os puntos críticos onde os colectores se enchen de forma indebida ou onde se repiten as prácticas incívicas. Esta coordinación permite que a disciplina no servizo sexa moito máis efectiva.
"Non é de recibo que uns estean facendo o esforzo de facelo ben e outros estean dando mal exemplo ou desfacendo o traballo da maioría", concluíu o edil, quen agarda que estas 16 sancións sirvan de aviso para garantir que o sistema de reciclaxe de Pontevedra funcione con rigor e xustiza.
Paralelamente ás sancións, o Concello iniciou un programa de visitas a grandes produtores de residuos para asesoralos sobre como tratar os refugallos máis complexos. Ata o momento realizáronse máis de 70 visitas, cun ritmo que permite prever que se acadará o obxectivo de entre 800 e 1.000 inspeccións anuais.
Mosquera recoñeceu que esta iniciativa é necesaria para emendar a falta de información que sofren todos os concellos sobre certos fluxos de residuos. Actualmente, a administración local descoñece que cantidade de alimentos se desvían a entidades sociais antes de caducar ou canto aceite se recicla.