O alcalde de Pontevedra, Miguel Anxo Fernández Lores, foi reelixido por unanimidade dos municipios presentes como presidente da rede de Cidades que Camiñan.
Durante a asemblea xeral da entidade, que tivo lugar en Valladolid, decidiuse que será Pamplona a cidade sede do congreso do próximo ano 2024, cando se cumprirán once edicións de celebración deste evento.
Lores fechou co rexedor de Valladolid, Jesús Julio Carnero, o congreso que reuniu na capital castelá un total de 25 intervencións de especialistas e dous obradoiros sobre comunicación e rúas de convivencia, nunha xuntanza marcada polas temáticas da saúde e as peonalizacións máis aló dos centros urbanos.
Os dous alcaldes coincidiron en que "os procesos de recuperación das cidades son imparables" e subliñaron que os concellos "deben camiñar cara a modelos máis amables e camiñables".
Ao rematar o evento entregáronse os premios Cidades que Camiñan a Miajadas (Cáceres), Vilagarcía de Arousa, Pamplona, Braga e Barcelona.