Na tarde do martes, axentes do grupo 2 da Unidade de Droga e Crime Organizado (UDYCO) da Policía Nacional de Pontevedra entraron nunha nave de Mourente. Levaban meses investigando a un grupo que cultivaba e comercializaba marihuana e faltáballes entrar no lugar de cultivo para culminar a operación. Unha vez dentro, sorprendeulles o tamaño da plantación e toda a montaxe que tiñan preparada tanto para cultivar como para custodiar a nave.
Así, segundo puido saber PontevedraViva, a plantación tiña ao redor de 2.500 plantas de marihuana, unha cifra sen precedentes na cidade de Pontevedra, e tíñana montada ata o mínimo detalle, con lámpadas de gran potencia -sorprende o tamaño das lámpadas, que pode verse na foto que acompaña esta información-, ventiladores e todo un sistema de rega e iluminación.
O sistema montado garantía, segundo fontes consultadas, ter catro cultivas de marihuana a ano. Grazas ao bo traballo policial, non lograron culminalas, pois meses de investigación deron os seus froitos e esta semana deuse por desmantelada.
Os responsables da plantación levaban nestas instalacións desde o pasado mes de maio, medio ano no que os veciños do pobo non se decataron de nada sospeitoso. Este mércores, mentres os policías e operarios da empresa Tragsa desmantelaban a plantación, saía un forte cheiro a marihuana que se cheiraba a varios metros de distancia, pero ata este momento ninguén o percibía porque utilizaban filtros de aire para evitar que saíse ao exterior.
Eses filtros eran unha peza máis do complexo sistema de cultivo que tiñan establecido nesta nave da Bouza, en Mourente, nas inmediacións da igrexa e o cemiterio parroquial, na que tiñan dúas plantacións diferenciadas e un sementeiro.
O complexo sistema consumía gran cantidade de electricidade que eles tiñan picada, isto é, conectada directamente á iluminación pública para evitar pagar pola enerxía consumida e tamén ter consumos elevados que puidesen levantar sospeitas.
A nave era unha antiga fábrica de pantalóns e batas que leva anos pechada e que, desde o exterior, estaba aparentemente abandonada. Tiña as xanelas tapiadas e reixas, pero, en realidade, dentro a actividade era continua durante todo o día.
De feito, os responsables da plantación tiñan mesmo unha gorida na que vivir as 24 horas do día para coidala. Na zona dianteira da nave tiñan un habitáculo preparado con dúas camas e cunha ampla despensa chea de comida en conserva, pan de molde, café, cola-cao, leite, azucre e outros alimentos non perecedoiros que lles garantía estar ben alimentados durante unha longa tempada sen necesidade de saír da nave.
Eran os guardeses e este martes foron detidos. Na operación houbo un terceiro detido xa e este mércores a operación segue aberta e non se descartan máis detencións.
Tras a detención o martes e desmantelamento da plantación o mércores, os axentes da Policía Nacional recolleron toda esa comida que localizaron na nave e teñen pensado doala a Cáritas para evitar que se perda e, polo menos, darlle un bo uso a pesar de estar relacionada co tráfico de marihuana.