O balance do últimos cinco días na área sanitaria resulta tráxico. Este mércores 25, Saúde Pública confirmaba a morte doutra persoa diagnosticada con coronavirus no Hospital Montecelo.
Trátase dunha muller de 84 anos, que se atopaba ingresada neste centro do Complexo Hospitalario Universitario de Pontevedra. Segundo indican desde a Consellería de Sanidade presentaba outras enfermidades previas no seu historial clínico.
Desde o sábado 21 de agosto faleceron cinco persoas na área sanitaria de Pontevedra-O Salnés debido a esta enfermidade. O sábado 21 perdía a vida un home de 90 anos, procedente da residencia Soremay; o domingo 22, unha muller de 91 e un home de 92; e o martes 24, unha muller de 68 anos, á que se suma agora a vítima notificada este mércores.
A área sanitaria eleva a cifra de decesos a 199 pacientes desde que se informa das mortes provocadas pola covid-19. Desde o inicio do plan de continxencia curáronse 19.983 pacientes, 78 máis este mércores que na xornada do martes.
Saúde Pública tamén notificaba o falecemento durante a xornada do martes doutra vítima en Galicia con coronavirus, unha muller de 80 anos que se atopaba ingresada no Hospital Virxe da Xunqueira en Cee, A Coruña.
Con estas novas mortes, Galicia alcanza a cifra de 2.552 óbitos relacionados coa enfermidade desde o inicio da pandemia.