Pontevedra sumouse este xoves á conmemoración do Día Mundial da Síndrome de Down para reivindicar a importancia da inclusión das persoas con esta síndrome e outras discapacidades intelectuais. Para darlle visibilidade a esta reivindicación, Down Pontevedra Xuntos, en colaboración co Concello, colocou unha gran pancarta na balconada da Casa da Luz, na praza da Verdura.
O acto tivo unha importante presenza institucional. Ademais do presidente e a coordinadora de Down Pontevedra Xuntas, Manuel Pérez Cabo e Paula Villaverde Gondar, participaron o alcalde, Miguel Anxo Fernández Lores; os voceiros do PP e o PSOE, Rafa Domínguez e Iván Puentes, e varios concelleiros.
Non faltaron persoas usuarias da asociación, Pedro García, Celso Luengo, Óscar Viñas e Miguel Pérez, e todos xuntos subiron á Casa da Luz para participar no acto simbólico.
Manuel Pérez Cabo destacou que o Día Mundial da Síndrome de Down é "unha xornada para reivindicar" na que este ano buscan "poñer o foco na falta de oportunidades laborais do colectivo", xa que os datos indican que soamente un 5% das persoas coa síndrome de Down traballa en contornas ordinarias.
Antes de despregar a pancarta, Lores recoñeceu que son "conscientes de que queda moito que avanzar" na sociedade para a plena integración das persoas con discapacidade intelectual, para que poidan ter os mesmos dereitos que as persoas sen esa discapacidade.
O alcalde sinalou que este tipo de días mundiais "son importantes para visibilizar" os seus dereitos e o traballo necesario de toda a sociedade para permitir esa integración social e laboral, que é "a única forma de que realmente se integren". Sen esa integración, mantén Lores, "malamente se poden facilitar os dereitos".
Iván Puentes tamén lembrou a "necesidade de inclusión real e de igualdad de real" das persoas con esta discapacidade e sinalou a importancia deste día para recordar que as administracións públicas "podemos e debemos" traballar nese campo para conseguir igualdade de dereitos. Tamén quixo reivindicar a labor das asociacións.
DÍA MUNDIAL
Durante as últimas semanas, Xuntos promoveu distintas actividades para sensibilizar á sociedade sobre as capacidades das persoas coa síndrome de Down e outras discapacidades intelectuais. Profesionais e persoas usuarias da entidade participaron en xornadas de sensibilización en centros educativos da contorna, onde están a dar visibilidade á importancia de que todos os nenos e nenas compartan espazo nas aulas.
Tamén traballaron con clubs deportivos, centros cívicos e asociacións pontevedresas, onde se puxo de manifesto o moito que as persoas coa síndrome de Down e outras discapacidades intelectuais poden ofrecer á sociedade da que forman parte.
Un ano máis, os principais monumentos das sete grandes cidades de Galicia tinguiranse de azul e amarelo para conmemorar o Día Mundial da Síndrome de Down. En Pontevedra pode verse desta cor o Pazo Provincial.
Con motivo do Día Mundial da Síndrome de Down, as entidades Down de España lanzaron a pasada semana a campaña #ExtraCapacitados, un vídeo no que o humor e a ironía son protagonistas, e cuxo mensaxe está centrado en que as persoas coa síndrome de Down están ‘extracapacitadas’ para aproveitar as oportunidades laborais.