Tras recibir todos os permisos favorables das administracións implicadas, por estar nun espazo de alto valor paisaxístico e natural, o goberno municipal de Sanxenxo sacou a licitación o proxecto de rehabilitación da Telleira, en Vilalonga.
Esta actuación está valorada en case 833.00 euros e será sufragada a través do Plan de Sustentabilidade Turística dos fondos europeos.
A edificación foi executada en 2003 e consta dunha superficie de 2.504 metros cadrados.
O obxectivo da rehabilitación é dotar ao edificio dunha compartimentación espacial interior efectiva, que posibilite xestionar a súa climatización de forma independente no tempo, acoutando o seu funcionamento aos espazos e usos para lograr unha mellora da eficiencia enerxética.
A redistribución do espazo interior deixará unha sala de exposición permanente, unha sala multiusos, espazo para talleres de interpretación, almacén, aseos, centro de documentación, oficinas, sala audiovisual, sala de exposición itinerante, tenda temática e porche.
No proxecto contémplase, ademais de entradas accesibles, a instalación de ventilación e climatización das que hoxe carece e que estarán adaptadas aos criterios de máxima eficiencia.
Do mesmo xeito melloraranse os sistemas de illamento e drenaxes do edificio, para permitir un normal desenvolvemento das actividades para os que foi creado, mellorando notablemente os estándar ambientais interiores.
Tamén se mellorará a iluminación potenciando a implementación de novas tecnoloxías que redunden nun menor consumo e máxima eficiencia.
Finalmente, ordenarase a parcela circundante para a dotación dun pequeno aparcadoiro acoutado que evite a dispersión actual de vehículos que non presentan ningunha orde e que deterioran o terreo.