O Ministerio de Transportes e Mobilidade Sostible autorizou este martes a cesión ao Concello de Pontevedra do tres quilómetros da N-550 que hai entre Pasarón e Alba, un trámite que permitirá desbloquear a construción da coñecida como variante de Alba.
Apenas dúas semanas despois da reunión entre o alcalde de Pontevedra, Miguel Anxo Fernández Lores, e o secretario de Estado de Transportes, José Antonio Santano, o Goberno permitirá que a administración municipal se faga cargo deste tramo do vial.
A cesión, segundo explicou o ministerio, autorízase tras unha "avaliación exhaustiva" por parte da Dirección Xeral de Estradas, que analizou a procedencia de entregar ao Concello o control sobre os quilómetros 115,200 e 118,420 da N-550.
O Concello de Pontevedra asumirá así a titularidade deste tramo, unha superficie estimada de máis de 114.000 metros cadrados, con todos os seus elementos auxiliares e equipamentos.
Será, a partir do momento en que a cesión se faga efectiva coa firma da acta por ambas as partes, o responsable da súa conservación e mantemento.
Esta cesión producirase para facilitar a futura actuación sobre a chamada variante de Alba, tras o acordo entre o Concello e a Xunta de Galicia.
Desde o Ministerio de Transportes sosteñen que atenderon a esta necesidade do territorio polo seu "forte compromiso" coa mellora da mobilidade e da vida das persoas.
Con esta cesión, a futura variante de Alba, deseñada para unir a zona de Campañó na PO-531, a estrada cara a Vilagarcía, coa parroquia de Alba, en pleno trazado da N-550 cara a Santiago, poderá conectar con esta vía estatal á altura da antiga nave de DIA.
Ao facerse cargo destes tres quilómetros, o goberno municipal poderá ademais impulsar unha actuación para humanizar unha das principais entradas á cidade de Pontevedra, a avenida de Compostela, na que se acougará o tráfico e se prevé permeabilizar o tránsito entre Lérez e o campus universitario.