O monte da Raposeira, no que se atopa a canteira de Paredes, xa é de titularidade municipal. O Concello acordou coa comunidade de montes de Vilaboa a cesión indefinida deste espazo.
Son, en concreto, dúas parcelas que no seu conxunto suman 49.847 metros cadrados e que pasan a mans do Concello para dedicarse a actividades deportivas e ocupación do tempo libre.
O contido do convenio recolle o compromiso do goberno municipal de manter en bo estado tanto os terreos como as edificacións que se constrúan neles, así como a redacción dun proxecto para a posta en valor de todo o entorno.
Este proxecto, entre outras cousas, deberá incluír o peche de todo o perímetro da parcela cedida, así como o aproveitamento das paredes da antiga canteira como zona de escalada e practica do montañismo e outras actividades deportivas e de lecer o aire libre adecuadas o entorno.
O convenio, asinado polo presidente da comunidade de montes, José Luis López García, e o alcalde de Vilaboa, César Poza, reserva un local na Casa de Cultura para os comuneiros e o compromiso municipal da reforma da entrada e a mellora do sistema de desaugue da lagoa.
A incorporación destes terreos ao inventario municipal permite ao goberno local avanzar no proxecto de desenvolvemento integral para Vilaboa que inclúe acondicionar catro grandes áreas recreativas en Figueirido, A Canteira de Paredes, Riomaior e a Praza do Concello no Toural.
Trátase, segundo destacou Poza, de grandes espazos públicos abertos, orientados o lecer e a actividades deportivas e de tempo libre, que se complementan entre si e ao mesmo tempo favorecen o encontro social e a dinamización entre as parroquias.
Así, o parque de Figueirido contará cun auditorio ao aire libre e unha pista multideporte e a inminente reforma do parque de Riomaior dotará a este espazo de elementos e xogos para todas as idades destacando unha grada cuberta entre a pista de tenis e futura pista multideporte.
A canteira será unha gran zona verde con actividades para o deporte e tempo libre, entre elas unha pista de pumptrack, e a futura Praza do Concello será un punto de encontro sobre o que pivotará o futuro núcleo de centralidade de Vilaboa.