O Concello de Vilaboa ten programadas obras de pavimentación de vías municipais en Ramalleira, Barciela e Figueirido, que serán financiadas íntegramente pola Deputación de Pontevedra.
A deputada provincial María Ramallo visitou este xoves o Concello de Vilaboa onde anunciou que a administración provincial destinará un orzamento de 140.000 euros do Plan +Provincia.
En concreto actuarase nas parroquias de Santo André de Figueirido (Figueirido), Santa Comba de Bértola (Ramalleira) e na de Santa Cristina de Cobres (Barciela).
Na actualidade estas estradas contan cun deterioro acusado do asfalto.
Ampliarase a sección da calzada, renovarase a capa de pavimento e executarase nova sinalización horizontal e vertical. Tamén dotarase ás vías de redutores de velocidade tipo lombo.
Este mesmo venres en Xunta de Goberno se aprobarán estes recursos que permitirán que Vilaboa poida realizar as actuacións necesarias para mellorar tres camiños mediante o reforzo do firme existente e da seguridade viaria de peóns e vehículos.
Ramallo recordou que este ano Vilaboa recibirá preto de 580.000 euros ao abeiro deste Plan +Provincia.
A deputada provincial afirmou que cos recursos provinciais, concellos como Vilaboa están a afrontar investimentos e actuacións "que modernizan os núcleos de poboación e melloran a calidade de vida das súas veciñas e veciños".