Recuperar un espazo actualmente deteriorado e infrautilizado situado nun lateral do pavillón municipal. É o obxectivo do novo proxecto que presentou o Concello de Vilaboa.
Queren construír unha pista de pádel, panorámica e cuberta, que sexa accesible e na que poida xogar a este deporte de maneira continuada ao longo de todo o ano.
A zona na que se intervirá funciona nestes momentos como aparcadoiro ocasional e, segundo o goberno municipal, presenta un acusado desgaste.
O proxecto contempla a preparación completa do terreo, a execución dunha soleira de formigón e a instalación dunha pista de pádel de vinte por dez metros con peche de vidro tépedo, estrutura metálica, iluminación e pavimento de céspede artificial.
Inclúe tamén a construción dunha cuberta metálica de aceiro lamelado, con perfís estruturais dimensionados para garantir estabilidade e durabilidad, así como a colocación de paneis curvados, canles, baixantes e elementos de reforzo.
A actuación abarca ademais a mellora da contorna inmediata, coa adaptación das rasantes, a creación dunha beirarrúa de formigón e a reorganización das prazas de aparcadoiro.
A instalación contará cun sistema automatizado de reservas, control de accesos e iluminación, co obxectivo de facilitar o uso da pista e optimizar o seu funcionamento.
O investimento total ascende a 213.299,41 euros. A actuación presentarase ao III Plan Extraordinario de Infraestruturas Deportivas da Deputación de Pontevedra.
O Concello xa encargou un estudo xeotécnico previo que recomendou o reforzo da cimentación, a adopción de medidas de drenaxe e o reforzo da cuberta, o que encarece a execución do proxecto pero garante o bo uso da futura instalación.
O executivo de Vilaboa destaca que esta infraestrutura permitirá ampliar a oferta deportiva municipal, responder á demanda crecente da veciñanza e reforzar a aposta por espazos públicos que fomenten hábitos saudables e a convivencia.