Coa presenza do portavoz nacional do BNG, Xavier Vence, o acto institucional de homenaxe á figura de Alexandre Bóveda dentro das actividades de conmemoración do Día de Galiza Mártir desenvolveuse no monumento levantado en memoria do ilustre galleguista na Caeira (Poio), próximo ao lugar no que foi fusilado o 17 de agosto de 1936.
Alí, integrantes dos grupos municipais do BNG no concello de Poio co alcalde Luciano Sobral á cabeza e do de Pontevedra, representado pola concelleira Anxos Riveiro recordaron a través das palabras do escritor Carlos Mella a figura de Bóveda ante máis de cincuenta asistentes entre os que se encontraban os fillos do galleguista, Xosé Luis e Amalia.
Xavier Vence sinalou a importancia que cobra neste ano o Día de Galiza Mártir para recordar os que loitaron para defender a democracia e a liberdade do país. O líder nacionalista criticou o Partido Popular cualificándoa de "dereita reaccionaria que ataca a democracia" pola súa política centralista e de recortes sociais. Vence indicou que o 15 de setembro, a forza nacionalista organizará unha gran mobilización reivindicativa en Santiago e realizou unha chamada á sociedade galega para que reaccione.
ACTO CÍVICO NO CEMITERIO DE SAN AMARO
Ás 19 horas comezaba no cemiterio de San Amaro o acto cívico no que se produciu o encontro entre o líder de Anova, Xosé Manuel Beiras, co alcalde de Pontevedra, Miguel Fernández Lores. Ambos os dous coincidiron no momento en que Xosé Luis Bóveda tomara a palabra para explicar en que ía consistir a homenaxe. Lords e Beiras, separados por Xavier Vence, saudáronse cun leve xesto de cabeza para darse a continuación a man discretamente nese inicio do acto.
O escritor Rodrigo Cota foi o encargado de relatar aos presentes a importancia que Alexandre Bóveda tivera como fundador da patria galega para indicar que "o día que ou mataron, tamén querían matar a Galicia".
ACTO POLÍTICO EN CURROS ENRÍQUEZ
A partir das 20 horas, o BNG celebrou, como xa vén sendo tradicional, un acto reivindicativo da figura de Bóveda como defensor do nacionalismo en Galicia. Nesta cita, interveu inicialmente o neto do galleguista, Valentín García Nieto, e a continuación Miguel Anxo Fernández Lores, Marta Dacosta e Xavier Vence.
* GALERÍA DE FOTOS E AUDIO DE XAVIER VENCE: