Arroupar conxúgase en feminino plural

Escribiu Rebeca Yanke en La ciencia de la amabilidad que "ás veces, escríbese chorando". Lembrouno Diana López Varela para darlle paso en As Mulleres que Opinan son perigosas e algo se removeu dentro da min. Fun consciente ao momento. Sentín reflectida nunha frase, resumida a realidade de moitos días nos que a vida se empeña en superarme, condensada en cinco palabras a sensación de fracaso que sinto desde que finalmente recoñecín que igual o xornalismo non é para min; ou eu non son para o xornalismo.

Dous días despois, escríboo chorando. Cando, con 13 anos, te das conta de que o que ti queres facer na vida é escribir nun xornal e pasas tres décadas estudando e traballando para conseguilo, é imposible que as bágoas non asomen se, con 43, as pezas non encaixan.

A sensación non é nova, pero desde que escoitei a Rebeca, é diferente. Son bágoas, pero reconfortan. Escoitar a tantas mulleres valentes e loitadoras ten un poder calmante. Este foro é punto de encontro para coñecer novas voces, desvirtualizar outras e aprender de todas; abre a mente, convida á reflexión e, sobre todo, é un lugar para sentirse segura. E arroupada. Sucede case sempre co feminismo, axuda a remover conciencias e revolucións e reconforta a partes iguais.

Díxoo Remedios Zafra: "o contexto feminista é un contexto que arroupa e compensa esas inseguridades". A frase deume moito que pensar e deime conta de que arroupar conxúgase en feminino plural porque, entre mulleres feministas, sentes un abrigo dificil de atopar noutros encontros. A min deume a seguridade (e a valentía) para recoñecer e compartir esta sensación de frustración e fracaso que sinto.

Porque non podo deixar que ninguén minimice o que enche a miña cabeza, porque sentir que o que sempre soñaches non funciona é igual de válido que ter a seguridade de que o xornalismo é o teu lugar no mundo. E tamén é válido non poder ou non querer falar do descanso que necesitei tomar, dunha das decisións máis meditadas que tomei na miña vida e que, pese a todo, son incapaz de explicar nun intercambio de saúdos.

Custa abrirse, vencer o medo a que te xulguen ou, no meu caso, o pánico a ser tema de conversa, pero estea días aprendín de mulleres fortes e referentes que soltar é sanador e que, cando o fas, sempre hai un feminino plural que te arroupa sen cuestionar e te acompaña na túa procura.