Festa dos libros

Pontevedra acolle a primeira fin de semana de xullo a novena edición da Festa dos Libros, que encherá a carpa da praza da Ferrería de literatura, encontros arredor da lectura e propostas culturais para todos os públicos.

A programación deste domingo 5 de xullo arrancará cunha destacada presenza da literatura para os máis pequenos.

O domingo 5 comezará cunha nova proposta para público familiar. Pablo Rumoroso abrirá a programación cunha sesión de contacontos con sorpresa baseada en Unha rosquilla no parque (Canica Books). A continuación, Nacho Rubio desenvolverá unha sesión de contos e ilustración arredor da súa obra Os nenos porcalláns (Pepa a Loba Editora).

Ás 12.30 h celebrarase o tradicional Vermú Literario de Pinto e Maragota arredor da obra gañadora da quinta edición do premio pola diversidade sexual e de xénero, As esquinas (Xerais), de Miguel Calvo Marques. O encontro contará coa participación de Sara Vila, escritora e membro do xurado, e da concelleira de Igualdade, Anabel Gulías, e estará amenizado por Hugo Andrade DJ. 

Xa pola tarde, ás 18.15 h, Arturo Lezcano falará de O país invisible (Libros del K.O.), Juan de Sola de Entre los muros del olvido (Libros del Futuro) e Valentín Carrera de El mundo desde abajo. La odisea australiana de Rosendo Salvado (Editorial Folch & Floch), obra gañadora do I Premio Altaïr de Literatura de Viaxes. Os tres autores dialogarán sobre a crónica, a memoria e a viaxe nun encontro moderado pola xornalista Laura Fresneda. 

Ás 19.15 h tomarán o relevo José Ignacio Carnero, que presentará Os fabuladores (Aira Editorial, con edición en castelán en Random House), e Francisco Narla, un dos autores galegos de maior proxección no ámbito da novela histórica, que achegará Ultreia e Suseia (Editorial Istoría. Grupo Planeta). O xornalista cultural Alfredo López Penide conducirá este faladoiro. 

A clausura da novena edición da Festa dos Libros, ás 20.15 h, contará coa participación de dúas das autoras de maior éxito do panorama actual: Arantza Portabales, referente da novela negra galega contemporánea, que presentará Asasinato no muíño do cura (publicada en galego por Editorial Galaxia e en castelán por Lumen), e María Oruña, unha das voces máis destacadas da narrativa de misterio e suspense, que falará da súa novela La Cámara de las Maravillas (Plaza & Janés), nun encontro moderado polo xornalista Álex Espiño. 

Praza da Ferrería, Pontevedra